Mar
17

ආදරය කරන අය ජීවිතයට එනවා යනවා

 
1819 Views
   
 

මාලිනියගෙන් පසුව ෆොන්සේකා පවුලෙන් කලාවට එකතු වුණ රංගන ශිල්පිනියන් අතරින් ආදරණීය චරිතය වී ඇත්තේ ෂෙනාලි ෆොන්සේකා යි. රංගනයෙන් පමණක් නොව හුරතල් හිනාවෙන් කතාවෙන් නිරහංකාර පැවැත්මෙන් ඇය රසිකයන් හා බැඳී සිටිනවා. මේ දිනවල සුදු චූටි කියන හුරතල් නාමය හා බැඳී සිටින ෂෙනාලි ආදරයයි ජීවිතයයි ගැන අපට කිව්වෙ මෙන්න මේ වගේ කතාවක්.

දැන් ඉතින් විවාහයක් ගැන හිතන්න කාලෙ හරි නේද?

මගේ ජීවිතයේ බොහෝ දේවල් සිද්ධවුණේ අහම්බෙන්. ඒ නිසාම සැලසුම් කළ දේවල් ලැබෙනව අඩුයි. මම අනාගතයේ මේ වගේ තැනකට යනව කියන සැලසුමක් හිතින් හදාගෙන එන එන විදිහට ජීවිතයට මුහුණ දෙන එක තමයි මගේ විදිහ. ආදරය, විවාහය කියන දේවල්වලදි වුණත් ඒක මෙසේම විය යුතුයි කියල බලාපොරොත්තුවලට යටවෙලා නැහැ. දැන් මට ආදර සම්බන්ධතාවයක් ඕනි විවාහයක් ඕනි කියල ඒක පසුපස යන්නෙ නැහැ.

ෂෙනාලි අද දවසෙ කාට හෝ පෙම් කරනවද?

මෙහෙමයි, ආදරය කරන අය ජීවිතයට එනව යනවා. ස්ථිරවම ආදරය කරන කෙනෙක් හමුවෙලා විවාහයක් සිද්ධ කරගන්න කාලෙදි අනිවාර්යෙන්ම මම ඒ ගැන හැමෝටම කියනව.

විවාහ වෙන්න කැමති මොනවගේ කෙනෙක් එක්කද ?

මනුස්සයෙක් වුණහම තියෙන්න ඕන හොද ගතිගුණ තියෙන හොඳ මනුස්සයෙක් ලැබෙනව නම් ඒ ඇති. ඒ හැරෙන්න එයා උස ද කළු ද මිටි ද කියල මම ප්ලෑන් කරගෙන නැහැ.

දෙමාපියන්ගෙ කැමැත්ත අරගෙන දීග යන්න කැමති සාම්ප්‍රධායික කීකරු දුවක්ද?

මම දෙමවුපියන්ට කීකරුයි. ඒත් සාම්ප්‍රදායික දුවක් නෙවෙයි. මාව ඒ විදිහට වෙනස් කරල තියෙන්නෙ මගේ අම්මයි තාත්තයි. ඒ දෙන්න මට උගන්නල තියෙන්නෙ ස්වාධීන කෙනෙක් විදිහට නැගී සිටින්නයි. තාත්තිටයි අම්මිටයි ඕන මම සතුටින් ඉන්නව දකින්නයි. මම සතුටින් ගන්න තීරණයකට එයාල එරෙහි වෙන්නෙ නැහැ. නමුත් මට හොඳ නරක පෙන්වල දෙනව. තීරණය මගේ අතේ තියෙන්නෙ. අද වෙනකන් මම වැරදි තීරණ අරන් නැහැ. මගේ අම්මයි තාත්තයිත් ආදරය කරලා විවාහ වුණ දෙන්නෙක්. එයාල මට කියන්නෙත් ආදරය කරල විවාහ වෙන්න කියලයි.

විද්‍යාඥවරියක් වෙන්න ගිය ෂෙනාලිට නිළියක් වෙන්න සිද්ධ වුණහම මොනවද හිතුණෙ?

විද්‍යඥවරියක් විදිහට අපි කරන්නෙත් මිනිස්සුන්ට සේවයක්. රංගන ශිල්පිනියක් විදිහට මිනිස්සුන්ට රසාස්වාදය ලබාදෙන එකත් සේවාවක්. මම මොන රැකියාව කළත් මම කරන්නෙ මිනිස්සුන්ට සේවයක්. ලොකු නැන්දිගෙ රංගනය දැකලා පොඩි කාලෙම රංගනයට ආසාව මට ඇතිවෙලා තිබුණා. ඒත් පොඩි කාලෙ මගේ ආසාව වුණේ බොලිවුඩ් සිනමාවට එක්වීමයි. හැබැයි වයසින් වැඩෙද්දි මම තේරුම් ගත්තා ලාංකීය කලා ක්ෂේත්‍රය තමයි මට පහසු තැන කියල.

මේ දවස්වල සුදු චූටිට ලැබෙන ප්‍රතිචාර කොහොමද?

ඔව් මේ දවස්වල වැඩියෙන්ම ප්‍රතිචාර ලැබෙන්නෙ නාඩගම්කාරයොහි පාඨලි කියන චරිතයට තමයි පාඨලීට සරා කියන චරිතය කියන්නෙ සුදු චූටි කියලනෙ. ඉතින් රසිකයොත් කියන්නෙ සුදු චූටි කියල තමයි. මට හරි සතුටුයි සිරි පැරකුම් චිත්‍රපටයේ සිරිමල් එතනා මගේ නම වුණාට. නගා කියන නමින් තමයි මාව ප්‍රසිද්ධ වෙන්නෙ. හැමදාමත් මිනිස්සුන්ට මතක හිටින චරිතයක් වෙන්න පුළුවන් මෙවැනි චරිත ලැබෙන එක ගැන සතුටුයි.

ෂොනාලි ක්ෂේත්‍රයේ ගොඩක් වැඩ කරන වැඩ තියෙන කෙනෙක් නේද?

මම හිතන්නෙ මම එහෙම කෙනෙක් නෙවෙයි කියල. වැඩවලට ගොඩක් ආරාධනා ලැබුණා. අපි යම් චරිතයක් කළාට පස්සෙ ඒ වගේ චරිත ගොඩක් එනව. ඒ වැඩ පස්සෙ හඹායන කෙනෙක් නෙවෙයි. මම තෝරා බේරාගෙන හොඳ වැඩ වලට එකතු වෙනව. මම එහෙම කරන්නෙ මට විවිධ චරිත කරන්න ඕන නිසා තවමත් මම කරල තියෙන්නෙ වැඩ ස්වල්පයයි මම හිතනව මට ඉදිරියේදි තව ගොඩක් වැඩ කරනන්න තියෙනව කියල.

මාලිනිය හා ෂෙනාලිට නිතර ලැබෙන අවවාද මොනවද?

ඇය මට විශේෂයෙන් ගුරුහරුකම් දෙන්නෙ නැහැ. හැබැයි මගේ මොකක් හරි මගේ වැරැද්දක් අඩුපාඩුවක් දැක්කොත් ඒ අඩුපාඩුව කියනව. මම නිතරම බැණුම් අහන්නෙ හරියට කොණ්ඩෙ පීරන්නෙ නැහැ කියල තමයි. මගේ තාත්තගෙ පවුලෙ අය මට කතා කරන්නෙ කෝෂි කියල. මම ෂෙනාලි කෝෂිලා ෆොන්සේකා. ඉතින් අපේ පවුලෙ අය මට යොදල තියෙන හුරතල් නාමයි කෝෂි. ක්ෂේත්‍රයෙ වැඩවලදි ලොකු නැන්දි මට ෂෙනාලි කියල කතා කරහම මට හරි අමුතුයි. මම කියනව එහෙම කතා කරනන් එපා කියල. කෝෂිම කියන්න කියල.

ධම්මිකා සුරංජි පතිරණ
Courtesy – Aruna.lk

erertreterterter
මෙන්න බලන්න තවත් ගොසිප්