880 Views
වර්තමානය වනවිට දෙරණ නාලිකාවේ විකාශය කෙරෙන දෙවනි ඉනිම ටෙලි නාට්‍යයේ ” චූටි මැණිකේ” කියන චරිතය හරහා අතිශය ජනප්‍රියත්වයට පත් යොවුන් රංගන ශිල්පිනියක් තමයි ශලනි ප්‍රනාන්දු කියල කියන්නේ. ඇත්තෙන්ම ලිහිණි එහෙමත් නැතිනම් චූටී මැණිකේ කියන චරිතය හරහා ඇයට ඉතාමත් කෙටි කාලයක් තුළ ඉහළ ජනතා ආකර්ෂණයක් හිමිකර ගැනීමට හැකිවෙනවා. ඒ බව නොරහසක්
කෙසේවෙතත් දෙරණ රූපවාහිනී නාලිකාවේ සංවිධානය කෙරුණු අවුරුදු කුමරිය තේරීමේ තරගාවලිය ජයක්ග්‍රහනය ඇය ඒ ඔස්සේ මෙරට රංගන ක්ෂේත්‍රයට පිවිසෙනවා. එලෙස කලාවට පා තබන ඇය මේවෙද්දී ලංකාවේ හැමෝම ආදරය කරන චරිතයක් බවට පත්ව අවසානයි . ඉතින් අද අපි මේ විදිහට කතා කරන්න යන්නේ ” චුටි මැණිකේ” ලෙසින් රටම හදුනා ගත් ශලනි ප්‍රනාන්දු සමගිනුයි. ඇය ඇගේ අලුත්ම තොරතුරු අපිට කිවුවේ මේ විදිහටයි
” ඒ දවස්වල අපේ අම්මා කියන්නේ දුව කියලා. ගමේ අය සුදුණි කියනවා. හැබැයි රඟපාන්න ආවට පස්සේ චූටි මැණිකේ වුණා. මේ දවස්වල හැමෝටම ලොක්කි. කොහොමවුණත් තවමත් මම කැමති චූටි මැණිකේ කියලා කතා කරනවාට. මගේ උපන් ගම මීගමුව. මට අවුරුදු 04 ක් වනකොට තාත්ති මට අහිමි වෙනවා. අම්මයි, අයියයි තමයි ඇස් දෙක වගේ මාව බලාගත්තේ
මේ නිසා අනිත් කෙල්ලන්ට තිබුණ නිදහස මට නැතිව යනවා. උදේට ඉස්කෝලෙට එක්කගෙන යන්නේ අයියා. නිරන්තරයෙන්ම දැඩි ආරක්ෂාවක් මැද්දේ තමයි මම ජීවත් වුණේ. නමුත් යාළුවෝ මැද්දේ සතුටින් ඉන්න උත්සාහ කළා. මොකද, අම්මයි අයියයි සැර දාන්නේ මට තියෙන ආදරේට කියලා මම දන්නවා. ඉස්කෝලේ බැච් පාටියකටවත් යන්න අවසර නම් ලැබුණේ නැහැ” කියලයි
ඒ වගේම මම නිළියක් වෙන්න හීනෙකින්වත් හිතුවේ නැහැ කියන ඇය කියන්නේ සාමාන්‍ය පෙළ කරන කාලේ ඉඳලම මම හිතාගෙන උන්නේ පැෂන් ඩිසයිනර් කෙනෙක් වෙනවා කියල කියලයි. උසස් අධ්‍යාපනය සඳහා මම තෝරගන්නෙත් ඒ පැත්තමයි කියන ශලනි කියන්නේ අවුරුදු 17 දී නොහිතපු මොහොතක මම නිළියක් වෙනවා කියලයි. මේ අතර ඇය කියන්නේ සිඟිති අවුරුදු කුමරිය තරගයකටවත් සහභාගී නොවුණ මම දෙරණ අවුරුදු කුමරිය සඳහා යන්නේ නාලි පුංචි නිසාවෙන් කියලයි
එපමණක් නොවෙයි නාලි පුංචිට වුවමනාවක් තිබුණා අවුරුදු 16 පිරුණහම මාව අවුරුදු කුමරිය තරගයකට යවන්න කියන ඇය කියන්නේ මගෙන් අහන්නෙවත් නැතිව ඇය දෙරණ අවුරුදු කුමරියට ඉල්ලුම් පත්‍රයක් දාලා කියලයි. ඉතින් මේ විදිහට අදහස් දක්වපු ඇය දෙරණ අවුරුදු කුමරිය තරගාවලියට සහභාගි වු ආකාරය ගැන කියන්නේ මෙහෙම කතාවකුයි
” මුල්ම සිලෙක්ෂන් එකට යන දවසේ එතෙන්ට යනකන්ම මම ඇඬුවේ මේ තරගයට ඉදිරිපත් වෙන්න බැහැ කියලා. නමුත් බල කිරීම මත අඬලා අඬලා ඇස් ඉදිමෝගෙන තමයි මූලික වටයේ ආයුබෝවන් කියන වචනය කිව්වේ. විශාල පිරිසක් අතරින් එදා මම අවසාන 12 දෙනා අතරට තේරී පත්වුණා. මගේ බය නැති වුණේ අවසාන 12 දෙනාට තිබුණ වැඩමුළුවෙන්. ඒ සති කිහිපයේ මම පුදුමාකාර ආශ්වාදයක් ලැබුවා. ගෙදරට හිරවෙලා උන්න මට විවිධ පැතිවලින් ආපු යුවතියන් සමග කතාබහ කරනකොට පුදුමාකාර අත්දැකීම් ගොඩක් දැනුණා.” කියලයි
ඒ වගේම ඇය දෙවනි ඉනිම ටෙලි නිර්මාණයට එක්වු ආකාරය සිහිපත් කරමින් කියා සිටියේ මෙහෙම කතාවක් ” එදා තමයි ලක්සිරි සර් මට කතා කරලා කිව්වේ දෙවෙනි ඉනිමේ රඟපාන්න අලුත් යුවතියකට අවස්ථාව තියෙනවා කියලා. මට හිතාගන්න බැරි වුණා. මොකද, ඔයකාලේ මම දෙවෙනි ඉනිමට පිස්සු හැදුණ රසිකාවියක්. රවීන් අයියාගේ රංගනයට කොච්චර කැමතිද කියනවානම් රාත්‍රි පන්ති කට් කරලා ගෙදර එනවා දෙවෙනි ඉනිම බලන්න ඕනි නිසා. පළවෙනි ස්ක්‍රීන් ටෙස්ට් එකේදී අපට තිබුණේ සොනාලි ටීචර්ගේ චරිතය රඟපාන්න
මම සාරියක් එහෙම ඇඳගෙන ගියේ. බිම බලාගෙන සංයමයෙන් රඟ පෑවා. පස්සේ දැනුම් දෙන්නම් කිව්වා. හැබැයි දෙවෙනි ඉනිමට තෝරගත්තා කියලා චරිත් අයියා කතා කරලා කිවුවහම මට දැනුනේ මුළු ලෝකෙම ලැබුණා වගේ හැඟීමක්.” යනුවෙනුයි. මේ ආකාරයට අදහස් දක්වපු ඇය අවසාන වශයෙන් කියා සිටියේ
” රඟපානවාට වඩා දෙවෙනි ඉනිමේ රඟපාන නළු නිළියෝ බලන්න ලැබෙන එකටයි මම කැමති. මටවත් හිතාගන්න බැරි විදිහට මට මුලින්ම රඟපාන්න තිබුණේ අනුහස් එක්ක. එදා රවීන් අයියත් එක්ක ගත්තු පිංතූරේ තාමත් මගේ ළඟ තියෙනවා. ආධුනික නිළියක් හැටියට ආපු මට කිසිම ලොකුකමක් පෙන්නන්නේ නැතිව රවීන් අයියා කරපු උදවු හැමදාම මගේ මතකයේ තියෙනවා. ධර්මප්‍රිය ඩයස්, අංජුලා රජපක්‍ෂ, හිමාලි සයුරංගි වැනි ප්‍රවීණයන් දුන්න අතහිත නිසා තමයි මේ ගමන මෙච්චර දුරක් ආවේ.” කියලයි
