Sep
15

තාරුණ්‍ය සවිබල ගන්වන ජාතික යොවුන් සේනාංකය

 
16 Views
   
 

තරුණ පරපුර රටක සංවර්ධනයෙහි ජීවනාලිය වේ. රටේ අනාගතය පිළිබඳ හිමිකරුවෝ ද ඔවුහු ම ය. හෙට බිහිවන නව ලෝකය ගොඩනඟන්නෝ ද ඔවුහු ම ය. මේ නිසාවෙන් ම රටෙහි තරුණ පරපුර කෙරෙහි අප කාගේත් නොමඳ සැලකිල්ල යොමුවිය යුතුය. රටක වගකීම භාර ගැනීමට සිටින තරුණ පරම්පරාව අයාලේ ගියහොත් සිදුවන විපත අමුතුවෙන් කිවයුතු නැත. තරුණයා යනු සිල්ගත් අහිංසක පුරවැසියෙක් යැයි අර්ථකථනය කළ නොහැක. ජවසම්පන්න, එඩිතර තාරුණ්‍ය රටට සම්පතකි. අලුත් දේ සොයන, අලුත් දේ තනන විචක්ෂණශීලී බුද්ධියකින් කටයුතු කරන තරුණ පරම්පරාවක් රටකට සිටී නම් එය රටේ වාසනාවකි.

නමුත් වර්තමානය වන විට කොරෝනා වෛරසය (Covid 19) මිනිස් ජීවිතවලට බලපෑම් එල්ල කරමින් සිටී. මෙය ලාංකේය සමාජය තුළ මෙන්ම ලෝකය තුළ තීරණාත්මක ලෙස පැතිරීයාමත් සමඟ සියලු පාර්ශවයන් හි බිඳ වැටීම් රාශියක් සිදුවන්නට විය. මෙයින් වඩාත්ම බලපෑම් එල්ල වූයේ තරුණ පරපුර වෙත යැයි කීම කාලෝචිත වනු ඇත. කොරෝනා වෛරසය ලෝකය පුරා පැතිරීයාමත් සමඟ ම ලෝකය භෞතික ව දුරස්වෙමින් තාක්ෂණය පෙරටත් වඩා මිනිසාට සමීප විය. වෙන් වෙන් ව ජීවත් වුව ද එක් තැන් ව පොදු තාක්ෂණයක් භාවිතයට ගැනීමට කොරෝනාව සමඟ මිනිසාට සිදු විය.

තාරුණ්‍යය තුළ තිබිය හැකි මෙම මන්දෝත්සාහී ගතානුගතික චින්තනය වෙනස් කිරීමටත් ඔවුන් තුළ තිබෙන්නා වූ සහජ හැකියාවන් වර්ධනය කොට සමාජගත කිරීමටත් ජාතික යොවුන් සේනාංකය මඟින් විවිධ ක්‍රියාකාරකම් දියත් කරමින් පවතී. කලබලකාරී බව, බලාපොරොත්තු විරහිත බව, විරැකියාව නිසා ඇතිවන මානසික ආතතිය, ආචාරශීලී නොවීම, සුඛෝපබෝගී ජීවිත ගත කිරීමට ඇති කැමැත්ත තාරුණ්‍යයේ ගති ලක්ෂණයන් ය. නමුදු මේ අදහස් සියල්ල පරයා යන විනයානුකූල බවක් සමාජගත වීමට සූදානම් වන තරුණයා තුළ තිබිය යුතුමය. ජාතික යොවුන් සේනාංකය සතු සුවිශේෂී ඉලක්කය වන්නේ විනයගරුක බව ඇති කිරීමයි. උසස් පුරවැසි ගුණාංග ප්‍රගුණ කරවන ජාතික යොවුන් සේනාංකය ජාතික ගීයට, ජාතික කොඩියට පමණක් නොව එදිනෙදා චර්යාවන් කෙරෙහි ද අවධානය යොමු කරමින් මෘදු කුසලතා සංවර්ධනය කිරීමේ කටයුතු තම පුහුණු න්‍යාය පත්‍රයට ඇතුළත් කොට ඇත්තේ නිසි සංයමයකින් යුතුව අනාගත භාරකරුවන්ගේ අනන්‍යතාවය පිළිබිඹු කිරීමේ අරමුණෙනි.

විනය, නායකත්වය, පෞරුෂ සංවර්ධනය යන ත්‍රිවිධ තේමාවන් පදනම් කරගනිමින් ක්‍රියාත්මක වන්නා වූ ජාතික යොවුන් සේනාංකය අනෙක් සියලු යෞවන පුහුණු බලගැන්වීම් අභිබවමින්, අභියෝගයන්ට ද අභියෝග කරන්නට පෞරුෂයෙන් හෙබි ශක්තිමත් යොවුන් බලකායක් ගොඩනැඟීම සඳහා පැහැදිලි වූත්, විධිමත් වූත් විවිධ පැතිකඩ හරහා ක්‍රියාත්මක වෙමින් පවතී. සියලු බාධක හමුවේ නොසැලී, නොවැටී, වැටුණු තැනින් නැඟී සිටින්නට හැකි ආත්ම ශක්තියක් තමන් තුළ ගොඩනැඟීමට ජාතික යොවුන් සේනාංකය හා එක්වන පුහුණුලාභීන් හට පුහුණු කාලසීමාව තුළ දීම මනා ලෙස පුහුණුව ලබා දෙනු ලබයි.

සමාජ මානව විද්‍යාඥයින් විසින් යෞවනයන් තමන් තුළම අනාගතය පිළිබඳ උදාසීනගතියක් ඇති කරගන්නා බව පවසයි. ඕනෑම කෙනෙකු තම ජීවිතයේ තම අනන්‍යතාවය ගොඩනැඟීමේ ක්‍රියාදාමය තුළින් කණ්ඩායම් හා උප සංස්කෘතීන් බිහිකර ගනී. ඒ අනුව තමන් තමන් තුළ ඇති කරගනු ලබන උදාසීනගති ඉවත් කොට සුබවාදී අනාගතයක් කරා තාරුණ්‍ය ඔසවා තැබීමේ කාර්යභාරය ජාතික යොවුන් සේනාංකය විසින් මනාවට සිදු කරනු ලබයි.

කොරෝනා පැමිණීමට පෙර තාක්ෂණය මඟහැරි බොහෝ පිරිස් පසුව තාක්ෂණයට සමීප වූයේ එයට අනුගත වීමට සිදුවූ හෙයිනි. මෙම කොරෝනා ව්‍යවසනය සමඟ අධ්‍යාපනයට ද කිසියම් ආකාරයක ඉදිරි පියවරක් තබන්නට සිදුවිය. ඒ මාර්ගගත අධ්‍යාපන ක්‍රමවේදයක් (Online Education) සඳහා ළමා හා තරුණ පරපුර යොමු කිරීම තුළිනි. ඇතැම් සිසුන් අන්තර්ජාල අධ්‍යාපනයට පිවිස සිටින නමුත් එම වරප්‍රසාදය සෑම දෙනාට ම එකසේ භුක්ති විදීමට නොහැකි වී ඇත. සිසුන්, පුද්ගලික අන්තර්ජාල මාර්ගගත (Online) අධ්‍යාපනයට යොමුවීම කෙරෙහි ඔවුන්ගේ ආර්ථික සහ සමාජ මට්ටම ද බලපානු ලබයි.

5

කරුණු එසේ හෙයින් ජාතික යොවුන් සේනාංකය තම පුහුණු කටයුතු මෙම ව්‍යසනය පවතින කාල වකවානුව තුළදී ද අඛණ්ඩව සිදු කරගෙන යාම සුවිශේෂී තත්ත්වයකි. ඒ සඳහා සියලු යොවුන් සේනාංක පුහුණුලාභීන් වෙත අන්තර්ජාල පහසුකම් සහිත සිම්පත් නොමිලේ ලබා දෙමින් මූලික පෞරුෂ සංවර්ධන, නායකත්ව හා මෘදු කුසලතා සංවර්ධන පුහුණු පාඨමාලාව අඛණ්ඩව පවත්වාගෙන යනු ලබයි.

කොරෝනා වෛරසය හේතුවෙන් සියලු පාර්ශවයන් බිඳ වැටෙද්දී ජාතික යොවුන් සේනාංකය සිය වගකීම සහ යුතුකම මනාවට පිළිඹිබු කරමින් ජාතික මට්ටමේ වැඩසටහන් රැසක් දිවයින පුරා ක්‍රියාත්මක කරන්නට විය. මේ සියලු වැඩසටහන් පුහුණුලාභී යෞවන යෞවනියන් තුළ කොරෝනා වෛරසය හේතුවෙන් ඇති කළ අනිසි බලපෑම්හි ප්‍රතිඵල ලැබෙන්නට නොදී ඔවුන් තමන් තුළම ස්වේච්ඡා සමාජ සේවකයෙකු නිර්මාණය කර ගැනීමේ ඉලක්කය සපුරා ගැනීම දක්වාම දිගු විය. වසර දෙකකට ආසන්න කාලයක් කොරෝනාවෙන් බැටකන සමස්ත ලෝකවාසී ජනතාවක් ඉදිරියේ දී ශ්‍රී ලංකාව යම් ජයග්‍රාහී සීමාවකට පැමිණ ඇතැයි පිළිගත හැකිය. සියලු ජනතාව නිවෙස්වලට කොටු වන විට ජාතික යොවුන් සේනාංකය සිය ප්‍රාෙයා්ගික ව්‍යාපාති රැසක් මෙලෙස ක්‍රියාත්මක කරන ලදී.

3

කොවිඩ් 19 වසංගතය හමුවේ ලේ බැංකුවේ ලේ සංචිතයේ පැවතුණ ලේ හිඟය පියවීම සඳහා අමාත්‍ය නාමල් රාජපක්ෂ මහතාගේ සංකල්පයකට අනුව රට පුරා විසිරී තිබෙන ජාතික යොවුන් සේනාංක පුහුණු මධ්‍යස්ථානවලදී ලේ දන්දීමේ වැඩසටහන් සංවිධානට කරන්නට විය. මේ සඳහා හැකියාව ඇති තරුණ ප්‍රජාව සහ ඒ සඳහා හැකියාව ඇති සියලු දෙනා මේ සඳහා දායක වන්නයැයි සියලු රටවාසී රුධිර පරිත්‍යාගශීලී ජනතාවගෙන් ඉල්ලීමක් කළේය. ඒ අනුව සංචරණ සීමා පවතින කාලසීමාව තුළ දීද සෞඛ්‍ය මාර්ගෝපදේශ පිළිපදිමින් මෙම වැඩසටහන් ඉතා සාර්ථකව ක්‍රියාත්මක වෙමින් පවතී.

2

සෑම පවුලක් මෙන්ම, ජාති, කුල, ආගම් භේදයෙන් තොර සෑම සමාජයක් තුළම සුනඛයින්, බළලුන්, හාවුන් ඇතුළු විවිධ සතුන් නිවාස ආශ්‍රිතව ජීවත්වන අතරම සෘජු සොයා බැලීමකින් තොරව ගම්-නගර ආශ්‍රිතව වීදි තුළ ද සැරිසරමින් ජීවත් වේ.

උදා වූ කොවිඩ් 19 වසංගතය හමුවේ එවැනි අපට සමීප සත්ත්වයින් දැඩි ආහාර හිඟයකට පත්ව සිටින අතර, සංචරණ සීමා ක්‍රියාත්මක වීමත් සමඟ වෙනදා එම සතුන්ට ආහාර ලැබුණු සාමාන්‍ය ක්‍රමවේදය පවා වෙනස් විය. එබැවින් තාරුණ්‍යයේ මෘදු කුසලතා ගොඩනැංවීම තුළ සත්ත්ව කරුණාව, දයාව මෙන්ම, අප පරිසරය අවට සෑම ජීවියෙකුගේම දිවි පැවැත්ම වෙනුවෙන් වූ අප සතු සමාජ වගකීම පිළිබඳව විශ්වාසය තබන ජාතික යොවුන් සේනාංකය විවිධ ප්‍රදේශයන්හි ආහාරපාන දෛනිකව ආහාරපාන නොලැබීමෙන් අසරණව සිටින වීදි සුනඛයින් ඇතුළු ස්වයංව ආහාර සපයා ගත නොහැකි සත්ත්ව සමීපතමයින්ගේ කුසගිනි නිවීම උදෙසා විශේෂ මානුෂික වැඩසටහනක් “සත්ත්ව මිතුරු සත්කාරය” ලෙස දියත් කරන්නට විය.

එමෙන්ම, ජාතික යොවුන් සේනාංකයට අයත් සියලු මධ්‍යස්ථාන, පුහුණුලාභී යෞවන යෞවනියන් සහ ආදි පුහුණුලාභීන් ඉලක්ක කරගත් තරුණ කෘෂි ව්‍යවසායකත්වය ගොඩනැ‍ඟෙන විශේෂ ගෙවතු වගා තරගයක් “Y-Green” නමින් ඇරඹීමට තීරණය කෙරුණි.

6

දැනට රටෙහි පවතින කොවිඩ් වසංගත තත්ත්වය තුළ මෙන්ම, සංචරණ සීමා සහ නිරෝධායන රෙගුලාසි මත තවදුරටත් සමාජ සාමාන්‍යකරණය සිදු වීමට ඇති ඉඩකඩ අවම වීම මෙන්ම ඉදිරියේ දී ඇති විය හැකි ජීවන වියදම් දර්ශකය ඉහළ යාම වැනි කරුණු හේතුවෙන් ජාතික යොවුන් සේනාංකය හා සබැඳි තරුණ තරුණියන් වෙත එදිනෙදා ජීවිතයට ප්‍රයෝජනයක් වන පරිදි සක්‍රීය කෘෂි වැඩසටහනක් හඳුන්වා දීම මෙම “Y-Green” තුරුණු ගෙවතු වගා මෙහෙයුමේ අරමුණ විය.

කොරෝනා වෛරසයත් සමඟම ආපදාවට සහ අසරණභාවයට පත්වූවනට සහන සැලසීමේ අරමුණින් සුසුමකට සවියක් ආපදා සහන තුරුණු මෙහෙයුම ජාතික යොවුන් සේනාංක සමාජ සත්කාරක වැඩසටහන ආරම්භ කරන්නට විය. මධ්‍යස්ථානය සහ ඒ අවට සරණක් අවැසි අපේම ජනතාව වෙනුවෙන් ඇති හැකි උපරිමයෙන් සහන සැලසීමේ අරමුණින් මෙම වැඩසටහන් ආරම්භ කෙරුණි.

4

මෙම සියලු වැඩසටහන් ආරම්භ කරමින් හුදකලාව නිවෙස් තුළට සිර වී දිවි ගෙවනවාට වඩා තමන් තුළ ගොඩනඟාගන්නා ස්වයං ස්වේච්ඡා සේවකයා හරහා සමාජයට ඇති හැකි අයුරින් සේවයට කරන්නට ජාතික යොවුන් සේනාංක කාර්ය මණ්ඩලය, පුහුණුලාභී යෞවන යෞවනියන් මෙන් ම ආදි පුහුණුලාභින් ඉතා උද්‍යෝගීමත්ව සම්බන්ධ වන්නට විය. බාධක පැමිණිය ද, එම බාධක හමුවේ නොසැලී ඉදිරියට යාමට ජාතික යොවුන් සේනාංකය සිය මෘදු කුසලතා සංවර්ධන පුහුණුව මඟින් පුහුණුලාභීන් වෙත නිරතුරුවම ලබා දෙනු ලබයි. මෙකී සියලු සද්කාර්යයන් තමන්ට මෙන්ම, සමාජයට රටට වැඩදායී අනාගත පුරවැසියෙකු බිහි කිරීමේ තිඹිරි ගෙය බවට පත්වනු නිසැකය.

ජාතියේ එකම පෞරුෂ සංවර්ධන පුහුණු ආයතනය ලෙස ජාතික යොවුන් සේනාංකය මෙතෙක් ආ ගමන්මඟ තුළ පැමිණි අභියෝග ජයගෙන ඇත. ඒ තනිව නොවේ. දූරදර්ශී නායකත්වයක් සහිතව නිවැරදි ගමනක් එක්ව ගමන් කරන සියලු පිරිස්හි එකමුතුවෙනි. අප ඔබට ද ඇරයුම් කරන්නෙමු. අපි යන ගමන්මඟ පැහැදිලිව ඔබට පහදා දෙන්නෙමු. හෙට ලොව දිනන්නට හැකි සබුද්ධිමත්, පෞරුෂමත්, සොඳුරු පුරවැසියෙකු වීමට ජාතික යොවුන් සේනාංකය හා එක්වන්න. අරමුණක් නැති යෞවන ඔබ වෙනුවෙන් අප ඔබ තුළ ඇති හැකියාවන් මතු කරමින් ඔබේ අරමුණ කරා ළඟා වන්නට පාර පෙන්වන්නෙමු.

ශලිනි මනීෂා දොඩම්ගොඩ
මාධ්‍ය ඒකකය
ජාතික යොවුන් සේනාංකය

මෙන්න බලන්න තවත් ගොසිප්