1421 Views
කාන්තා රැඳවියන්ට ජංගම දුරකතන හා එම උපාංග විකිණීමට උත්සහ කිරීමක් සම්බන්ධයෙන් බෝගම්බර බන්ධනාගාර රෝහලේ ප්‍රධාන වෛද්‍ය නිලධාරීවරයා අත් අඩංගුවට ගෙන තිබේ.
බන්ධනාගාර මාධ්‍ය ප්‍රකාශක බන්ධනාගාර කොමසාරිස් (පාලන) චන්දන ඒකනායක මහතා ප්‍රකාශ කළේ, ප්‍රථිකාර ලබා ගැනීට පැමිණෙන කාන්තා රැඳවියන්ට මෙම වෛද්‍යවරයා විසින් ජංගම දුරකතන හා ඊට අදාළ උපාංග ලබා දෙන බවට ලද තොරතුරු මත බන්ධනාගාර අධිකාරීවරයා විසින් නිලධාරීන් කණ්ඩායමක් යොදවා විශේෂ මෙහෙයුමක් දියත් කළ ඇති බව ය
ඒ් අනුව ප්‍රධාන වෛද්‍ය නිලධාරීවරයා සිය නිල කාමරය තුළදී වෛද්‍ය ප්‍රතිකාර ලබා ගැනීමට පැමිණි සැකකාරියකට ජංගම දුරකතන චාර්ජරයක් හා බැටරි දෙකක් ලබා දීමට උත්සහ දැරූ අවස්ථාවේ බන්ධනාගාර නිලධාරීන් විසින් ඔහු අත් අඩංගුවට ගනු ලැබ ඇත.
පසුව වැඩිදුර ප්‍රශ්න කිරීම සඳහා බන්ධනාගාර අධිකාරීවරයාට ඉදිරිපත් කළ අවස්ථාවේ මීට පෙර අවස්ථාවල ජංගම දුරකතන කාන්තා රැඳවියන්ට මුදලට විකිණූ බවට වෛද්‍යවරයා පිළිගෙන ඇති බව බන්ධනාගාර මාධ්‍ය ප්‍රකාශකවරයා පැවසී ය.
සැකකාර වෛද්‍ය නිලධාරීවරයා ප්‍රතිකාර ලබා ගැනීම සඳහා පැමිණෙන කාන්තා අංශයේ රැඳවියන්ට ජංගම දුරකතන හා ඊට අදාළ උපාංග ලබා දී ඔහුගේ නමට මුදල් බැර කර ගන්නා ලද රිසිට් පතක් හා ලද තොරතුරු මත ඉකුත් 29 වන දින බන්ධනාගාර අධිකාරීවරයා විසින් නිලධාරින් කණ්ඩායමක් යොදවා රහසිගත විශේෂ මෙහෙයුමක් දියත් කරනු ලැබ තිබේ.
බන්ධනාගාර මාධ්‍ය ප්‍රකාශකවරයා වැඩිදුරටත් සඳහන් කළේ, සිදුවීම සම්බන්ධයෙන් පල්ලේකැළේ පොලිසිය වෙත දැනුම් දී ඇති බවත් සහකාර බන්ධනාගාර අධිකාරිවරයෙකු යොදවා මූලික විමර්ශනයක් සිදු කිරීමට බන්ධනාගාර දෙපාර්තමේන්තුව කටයුතු යොදා ඇති බවත් ය.
