Feb
15

” ගොඩක් අය හිතනවා මට මැනේජර්ස්ලා ඉන්න නිසා මම හරි ආඩම්බරයි කියලා” ජනප්‍රිය ගායිකා යොහානි ද සිල්වා

 
1046 Views
   
 

යොහානි කියල කියන්නේ පසුගිය කාලයේ ශ්‍රී ලංකාව තුළ පමණක් නොවෙයි ඉන්දියාව තුළත් අතිශය ජනප්‍රියත්වයට පත් වෙච්චි දක්ෂ ගායිකාවක්. ඇත්තෙන්ම ඇයව අපට ශ්‍රී ලංකාවේ නාමය ජාත්‍යන්තරයට රැගෙන ගිය චරිතයක් හැටියට හදුන්වන්න පුලුවනි. කොහොම නමුත් යොහානි ගැන කතා කරනවානම් ඇය පාසල් ගියේ කොළඹ විශාඛා විද්‍යාලයට.ඉන් අනතුරුව උසස් පෙළ හදාරන්න එංගලන්තයට යනවා. අනතුරුව නැවතත් ලංකාවට පැමිණෙන ඇය කොතලාවල ආරක්ෂක විශ්ව විද්‍යාලයෙන් උපාධිය සම්පූර්ණ කරලා ඕස්ට්‍රේලියාවට ගිහින් ගිණුම්කරණය පිළිබඳ පශ්චාත් උපාධියක් සම්පූර්ණ කරනවා

කොහොමහරි ඉතින් ඇගේ පවුලේ විස්තර ගැන කියනවානම් යොහානිගේ පියා වෘත්තියෙන් ශ්‍රී ලංකා යුද හමුදාවේ 53 වන සේනාංකයේ සේනාධිපති විශ්‍රාමික මේජර් ජෙනරාල් ප්‍රසන්න ද සිල්වා මහතායි. යොහානි කියල කියන්නේ මේ පවුලේ වැඩිමහල් දියණියයි. කොහොම නමුත් යොවුන් ගායිකාවක ලෙස ඉන්දියාවම වසගයට ගත් මේ ආදරණීය ගායිකාව සමගින් තමයි අද අපි මේ විදිහට කතා කරන්න යන්නේ

ඇත්තටම ඔබ ඉතාමත් කෙටිකාලයක් තුළ ලංකාවේ විතරක් නෙවෙයි ලෝකයේම අවධානය දිනාගත් චරිතයක් බවට පත්වෙනවා. ඉතින් ඔබට ඒ ගැන මොකද හිතෙන්නේ ?

ඇත්තටම මට හිතාගන්න බැරි ලොකු සතුටක් දැනෙනවා. මාස හතරක් වගේ කාල සීමාවක් තුළ වඩාත් ජනප්‍රිය වුනා මේක නොහිතපු විදිහට. මම මේ වෙනස කවදාවත් බලාපොරොත්තු වුණේ නැහැ. මම මියුසික් පටන් ගත්ත කාලේ දැන් කාලේ අතර ලොකු වෙනසක් තියෙනවා. මේ හැමදේම ගැන මට ඉතිරිවෙලා තියන්නේ සතුටක් විතරයි

යොහානි කියල කියන්නේ මේවෙනකොට ගායිකාවක ලෙස ක්ෂේත්‍රය තුළ ලොකු ගමනක් ආපු කෙනෙක්. ඉතින් ඒ එන ගමන අතරතුර ඔබට කලකිරීම් හිත් රිදීම් දැනිලා නැද්ද කලකිරීම් හමුවේ කලාවට ආවේ අපරාදේ කියලා ඔබට හිතිල නැද්ද?

අපොයි එහෙම කලකිරීම් හිත් රිදීම් ගොඩක් ඇතිවෙලා තියෙනවා. මම ඉන්දියාවට ගියාට පස්සෙත් සමහරු විවිධ කතා කීවා. හැබැයි මම ඔය වගේ දේවල් ගැන හිතන්නේ නැහැ. බොරු ප්‍රචාරක වලට මම රැවටෙන්නේ නැහැ. මම ඒ දිහා හැරිලවත් බලන්නේ නැහැ. අද විතරක් නෙමේ හෙටත් ඔවුන් කටකතා පතුරවයි. මට තාම සින්දු කියන්න බැහැ කියන අයත් ඉන්නවා මේ සමාජයේ. කොහොම වුණත් මම ඒ වගේ දේවල් භාර ගන්නේ නැහැ. මොකද ඒ වගේ දේවල් මට වැඩකුත් නැහැ

ප්‍රතික්ෂේප වීම් කියල කියන්නේ අපි හැමෝටම ජීවිතයේ විදින්න වෙන අත්දැකීමක්. ඉතින් යොහානි කියන මේ චරිතයට ජීවිතයේ ප්‍රතික්ෂේප වුන වාර තියෙනවද?

මගේ ජීවිතේ ප්‍රතික්ෂේප වීම කියන දේ ගොඩක් තැන්වල තියනවා. මියුසික් කරද්දී ගිටාර් කෝඩ් පවා මට වැරදෙන අවස්ථා තියෙනවා. මම ඉන්දියාවට ගිය වෙලාවේදී හිංදි සිංදුවක් කරන්න මට අවස්ථාව ලැබුනා. හැබැයි ඒ අවස්ථා දෙකේදීම සිංදුව වැරදුනා. එතැනදිත් මම ෆේල්. මම ඡායාරූපකරණය කළා. ඕස්ට්‍රේලියාවේ ඉගෙනගෙන ඕස්ට්‍රේලියාවේ පුරවැසි බව ලබා ලබා ගන්න මට අවස්ථාව තිබුනත් මම ලංකාවට එන්නේ සංගීතය නිසාමයි. කොහොම උනත් මම ප්‍රතික්ෂේප වුන තැන්වලින් නැගිටපු කෙනෙක්

ඇත්තටම යොහානි කියල කියන්නේ සැබෑ ජීවිතයේදී මොන වගේ කෙනෙක්ද කිව්වොත් ?

යොහානි කියන්නේ බොහොම සාමාන්‍ය කෙනෙක්. ගොඩක් අය හිතනවා මට මැනේජර්ස්ලා ඉන්න නිසා මම හරි ආඩම්බරයි කියලා. මම එහෙම ආඩම්බර කෙනෙක් නෙවෙයි. මම ගැන දන්න අය දන්නවා මම කවුද කියලා. මම තාම සංගීතය ගැන ඉගෙනගන්න කෙනෙක්. ඉතින් බොහොම සරල නිහතමානී කෙනෙක් තමයි යොහානිද සිල්වා කියන්නේ

erertreterterter
මෙන්න බලන්න තවත් ගොසිප්