May
22

30 වසරක සාපලත් යුද්ධය නිම කළ වීරයන් සමරමු

 
671 Views
   
 

70 දශකයේ දි අමිර්තලිංගම්ලා වැනි ජාතිවාදි දේශපාලඥයන්ගෙ ජාතිවාදී ප්‍රකාශ වලින් උද්දීපනය වූ දෙමල තරුණයො අවි ආයුධ අතට ගත්හ.

ත්‍රස්තවාදින්ගෙ පලමුවෙනි ගොදුර වූයේ යාපනය නගරාධිපතිව සිටි ඇල්ෆ්‍රඩ් දොරේඅප්පා මහතායි. එතුමාව ඝාතනය කළේ 1975 වසරේ ජූලි මාසයේ 27 වැනිදාය. යාපනය, පොන්නාලෙයි කෝවිලට ගොස් දෙවියන්ගේ ආශිර්වාදය ලබාගෙන එළියට පැමිණි ඔහුව ඝාතනයට ලක් වූයේ කෝවිල ඉදිරිපිටදීමය.

කෝවිලේ රිදී සීනු හඬ පරයා වෙඩි හඩින් මුළු යාපා පටුනම දෙදරුම් කෑවේය. දිනෙන් දින අවි ආයුධ වලින් සහ කෲරත්වයෙන් වර්ධනය වූ ත්‍රස්තවාදිහු 1983 ජූලි මස 23 වෙනි සෙනසුරාදා රාත්‍රියෙහි යුධ හමුදා සෙබළුන් රැගත් ජීප් රථයකට පහර දී සෙබළුන් 13 දෙනෙක් මරා දමා ඊලම් යුද්ධයෙ ඇරඹුම සනිටුහන් කළේය.

එදා සිට ලංකා ධරණි තලය ලෙයින් කඳුළින් තෙත් විය. ලංකා අහස් ගැබ සෝ සුසුමින් බර විය. කාලකන්නි යුගයක් ඇරඹුණු අතර ඉතිහාසයේ ම්ලේච්ඡම යුගය අප ගත කළේය.

1983 සිට ජනාධිපතිවරුන් පස් දෙනෙක් යටතේ පුරා දශක 3 කට ආසන්න කාලයක් මේ ත්‍රස්තවාදි යුද්ධයෙ අඳුරු සෙවණැලි මෙරට බියෙන් මුසපත් කළේය. ජනාධිපතිවරයෙකු වූ රණසිංහ ප්‍රේමදාස ජනාධිපති අපේක්ෂකයෙකු වූ ගාමිනි දිසානායක වැනි අය පවා මහමග ඝාතනය කර දැමීය. ජනාධිපති චන්ද්‍රිකා බණ්ඩාරනායක මැතිණියගේ ඇසක් අහිමිවිය.

මහපාරේ මහදවල් මියගිය මේ රටේ මිනිසුන් ගිනිය නොහැකි තරම්ය. උදේ ගෙදරින් පිටත් වූවාට පසු හවස ගෙදර ඒම අවිනිශ්චිත කාල පරිච්ඡේදයක් විය. ” තමන්ගෙ ආරක්ෂාව තමන් සලසා ගතයුතු බව ” ජනාධිපති ජේ.ආර්. ජයවර්ධන පවසා සිටියේය .

ලංකාවේ අස්සක් මූල්ලක් නෑර වෙඩි හඬ බෝම්බ හඬ පැතිරෙන්නට විය. මායිම් ගම්මාන කියා අළුත් වචන සිංහල ශබ්දකෝෂයට එකතු විය. ගම්මාන වලට පැන අත දරුවාගේ සිට ගැබ්බර මවගේ සිට සියල්ලන්ම කැති ගා මරා දැමූහ. ඒ නැගු මර ලතෝනි හඬ වර්තමාන පරපුරට ඇසුනේ නැත. ඇසුන උන්ට මතක නැත.

ශ්‍රි මහා බෝධින් වහන්සේගෙ සිට දළදා මාලිගාව දක්වා ආගමික භූමීයෙ සැදැහවතුන්ගෙ රුධිරය ගලා ගියේය. මහ බැංකුව, ගුවන් තොටුපල සිට රටේ සියලුම ආර්ථික මර්මස්ථාන වලට පහර දුන්නේය. රටේ ආර්ථිකය සුන්නත් ධූලි කර දැමීය.

ජනරාල් ඩෙන්සිල් කොබ්බෑකඩුව, විජය විමලරත්න ආදි රණවිරුවන්ගෙන් පටන්ගෙන දේශයට ආදරය කළ රණවිරුවන් දස දහස් ගණනකගේ මෘතයන් වලින් ලක් දෙරණ සුසාන භූමියක් විය. මව්වරුන්ට පියවරුන්ට දරුවන් අහිමි විය. බිරින්දෑවරුන් සස්වාමික විය. දරුවන්ට පියවරු අහිමි විය. දසතින්ම නැගුණේ සෝ සුසුම් පමණි.

මේ බිහිසුණු ත්‍රස්තවාදය මුලිනුපුටා දැමීමට නායකත්වය ගත්තේ ජනාධිපති මහින්ද රාජපක්ෂ මැතිතුමාය. එතුමන්ගෙ දේශපාලන භනායකත්වය හා එවකට රාජ්‍ය ආරක්ෂක ලේකම් ගෝඨාභය රාජපක්ෂ මැතිතුමාගේ සෘජු තීරණ ගැනීම හා මනා සම්බන්ධිකරණයෙ නිසාද.., ත්‍රිවිධ හමුදාපතිවරුන්ගෙ අප්‍රතිහත ධෛර්යයද පොලීසියෙ සහ සිවිල් ආරක්ෂක හමුදාවෙ නොපසුබට කැපවීමද සියලුම රණවිරුවන්ගෙ රුධිරය, දහඩිය සහ කඳුළු මතින් ඒ කුරිරු ත්‍රස්තවාදය අවසන් කරන්නට අපට හැකි විය.

තිස් වසරක ශාප ලත් යුද්ධය නිම කිරීමට

යුද හමුදා විරුවන් 28589ක්,
නාවික හමුදා විරුවන් 1160ක්,
ගුවන් හමුදා විරුවන් 443ක්,
පොලිස් නිලධාරීන් 2568ක්,
සිවිල් ආරක්ෂක නිලධාරීන් 456ක්,

තම තරුණ ප්‍රාණය මේ දෙරණ තුළ මිහිදන් කළෝය.

රට වෙනුවෙන් ඇස්, කන්, පා, දෑත් අහිමි වූ රණවිරුවන් අදත් අප අතර බොහෝමයකි.

2009 මැයි 18 අද වැනි දිනක මෙරට කුරිරු ත්‍රස්තවාදයට නායකත්වය දුන් වේලුපිල්ලේ ප්‍රහාකරන්ව නන්දිකඩාල් කලපුවේ දි මරා දමා තිස් වසරක කුරිරු යුද්ධය අවසන් කරන්නට අපේ රණවිරුවන්ට හැකි විය. පාබල, නාවික, ගුවන් යන ත්‍රිවිධ බලයම තිබු ලොව භයානකම ත්‍රස්තවාදි කණ්ඩායමක අවසානය එසේ සනිටුහන් විය.

මෙවැනි කුඩා සටහනකින් එදා ඒ පැවැති ත්‍රස්තවාදින්ගෙ කෲරත්වය සහ අභීත රණවිරුවන්ගෙ උදාරත්වය පැවැසීමට වචන ගොණු කළ නොහැකිය. අද ඒ ජයග්‍රහණයෙ දවසෙ 13 වැනි සැමරුමයි.

පුරා දශක තුනක් ජනාධිපතිවරුන් සිවු දෙනෙකු යටතේ පරාජය කිරීමට නොහැකි වූ ඒ බිහිසුණු යුධ ඒ ජයග්‍රහණය පිටුපස සිටි අයෝමය හස්තය මහින්ද රාජපක්ෂ මැතිතුමා වත්මන් අගමැතිවරයාය. එතුමාට උපදෙස් දී යා යුතු නිවැරදි මාර්ගය පෙන් වූ ගෝඨාභය රාජපක්ෂ මහතා වත්මන් ජනාධිපතිවරයායි. එදා යුදබිමේ එඩිතෙද පෑ ජනරාල් කමල් ගුණරත්න, ජනරාල් ශවේන්ද්‍ර සිල්වා වැනි උත්තුංග විරුවන් ඉහලම හමුදා නිල වලය.

අද අප මේ සමරන්නේ ඒ කෘතගුණ සැමරීමෙ දිනයයි. මෙරටේ සමහර පාපතරයින්ට ඒ රුදුරු ඉතිහාසය අමතකය. එනිසා මෙය තවත් එක් සැමරුම් උත්සවයක් පමණක්ම නොවේ. ඔවුන්ට ඒ ඉතිහාසය මතක් කර දෙන දිනයකි.

දේශයේ සෛවරීයත්වය හා භෞමික අඛණ්ඩතාවය වෙනුවෙන් දිවි පිදූ රණවිරුවන් සදා අනුස්මරණය කීරීම කෘතගුණ දත් ජනතාවගේ යුතුකමකි. ශ්‍රී ලාංකීක ජනතාවගේ එකී කෘතගුණ දැක්වීම උදෙසා මෙම කුඩා සටහන උපහාරයක්ම වේවා…!

erertreterterter
මෙන්න බලන්න තවත් ගොසිප්