2543 Views
රත්නපුර, ඇලපාත, මහිරාගල ප්‍රදේශයේ කාන්තාවක පිහියකින් ඇන අමානුෂික ලෙස ඝාතනය කර තිබේ.
මෙලෙස ඝාතනයට ලක්ව ඇත්තේ, 27 හැවිරිදි වියේ පසු වූ එම ප්‍රදේශයේම පදිංචි මීට මාස දෙකකට පමණ පෙර විවාහ වී ඇති කාන්තාවකි.
ඝාතනය සම්බන්ධයෙන් කෙහෙල්ඕවිටගම ප්‍රදේශයේ පදිංචි පුද්ගලයෙකු අත්අඩංගුවට ගෙන ඇත.
සැකකරු 21 හැවිරිදි වියේ පසුවන දෙදරු පියෙකි.
ඇලපාත ප්‍රදේශයේ පිහිටි සේවා ස්ථානයේ සිට සිය නිවසට යමින් සිටියදී අදාළ කාන්තාව මෙලෙස අමානුෂික ලෙස ඝාතනයට ලක් තිබේ.
ඇයගේ සැමියාද එම සේවා ස්ථානයේම සේවයේ නිරතව සිට ඇති අතර එදින ඔහු සේවයට ගොස් නොමැත.
ඝාතනය සිදු වූ දින පස්වරුවේ එම කාන්තාවගේ නිවසට මීටර් 500ක් පමණ දුරින් පිහිටි පාලු ස්ථානයකදී මාර්ගයේ රැඳී සිටි සැකකරු ඇයගෙන් රුපියල් 100ක මුදලක් ඉල්ලා ඇත.
කෙසේ වෙතත්, කාන්තාව එය ලබා දීම ප්‍රතික්ෂේප කිරීම හේතුවෙන් පිහියකින් ඇයගේ සිරුරේ ස්ථාන 3කට ඇන ඇතැයි සැකකරු විසින් පාපොච්චාරණය කරනු ලැබ තිබේ.
පසුව කාන්තාවගේ අත රැඳි ගමන් මල්ලද රැගෙන සැකකරු පළා ගොස් ඇත.
සිය බිරිඳ නිවසට නොපැමිණීම පිළිබඳව සොයා බලා ඇති සැමියා කාන්තාව හමු වූ පසු ඇයව රෝහල්ගතකිරීමට පියවර ගෙන තිබේ.
එසේ වුවද ඒ වනවිටත් ඇය මිය ගොස් සිටි බව සඳහන් වේ.
පොලිසිය විසින් සැකකරුගෙන් කරන ලද ප්‍රශ්නකිරීම්වලදී අනාවරණයේ වී ඇත්තේ, සැකකරු කසිප්පු පානයට ඇබ්බැහි වී ඇති බවත් කසිප්පු පානය කිරීමට මෙලෙස මුදල් ඉල්ලා සිට ඇති බවත්ය.
අත්අඩංගුවට ගත් සැකකරු රත්නපුර මහේස්ත්‍රාත් අධිකරණය වෙත ඉදිරිපත් කිරීමට නියමිතය.
ඇලපාත පොලිසිය මෙම ඝාතනය සම්බන්ධයෙන් වැඩිදුර විමර්ශනය කරයි.
